Dorchadas um Nóin (Darkness at Noon) le Arthur Koestler | Aistriúchán le Risteárd Mac Annraoi

Dorchadas um Nóin

le Arthur Koestler

Aistriúchán le Risteárd Mac Annraoi

Sept 10, 2020 

Tá aistriúchán nua le Risteárd Mac Annraoi ar an bhfód – leagan Gaeilge den leabhar Darkness at Noon le Arthur Koestler a céadfhoilsíodh i 1940.

“Dúnadh doras an chillín de phlab thaobh thiar de Rúbaiseov…”

Chaith Arthur Koestler (1905-83) saol fíoreachtrúil mar iriseoir, úrscéalaí, agus trodaire ar son an chirt. Ungárach de phór Giúdach ab ea é, fear iltíreach ildánach agus comhbhá aige le teifigh is cimí. Saoi de chuid na fichiú haoise ab ea é, agus tábhacht bhuan lena fhís. Chaith sé a dhúthracht leis an tsaoirse aigne a chothú i ngach tír.

Mór-úrscéal machnamhach is ea Dorchadas um Nóin a foilsíodh i 1941. Cáineadh ar stáit ollsmachtacha de shaghas ar bith atá ann, rabhadh d’éinne a mbeadh rómhuinnín aige as idé-eolaíocht ar bith. Ní mór aird a thabhairt ar fhírinní an chroí chomh maith leis an réasún fuarchúiseach.

Cime polaitiúil ina chillín uaigneach is ea Rúbaiseov. Tráth dá raibh, bhí sé óg idéalach, ag tnúth leis an Tír Tairngire. Tá curtha ina leith anois, áfach, gur fheall sé ar an réabhlóid a thug a ghlúin féin i gcrích. Agus an bás ag teannadh leis, tá léargas ar a shaol uaidh. Conas a tháinig drochthorthaí ar dhea-aisling? An bhfuil modhanna gránna mídhaonna ceart má chuireann siad cuspóirí uaisle chun cinn?

Is aistritheoir bisiúil é Risteárd Mac Annraoi agus cónaí air i gCorcaigh. Mar chuid dá thionscnamh chun litríocht an domhain a chur ar fáil do Ghaeil, tá aistriúcháin leis ar shaothar Franz Kafka, Erich Maria Remarque, Agatha Christie, Italo Calvino, Yann Martel, Eivgéiní Saimiatin, Stefan Zweig agus eile i gcló.

Is féidir an leabhar a fháil ó Gael-Taca i gCorcaigh.

_______________________________________

An Fear Nárbh Fhéidir a Fheiscint | The Invisible Man, H.G. Wells | Leagan Gaeilge le Séamus Ó Coileáin

 

An Fear Nárbh Fhéidir a Fheiscint 

(The Invisible Man, H.G. Wells)

Leagan Gaeilge le Séamus Ó Coileáin

€12.00

“Ritheann sé leis an nGrifíneach, eolaí iontach, gurbh fhéidir ábhar ar bith a chóiriú go ceimiceach ionas nach bhfeicfeadh an tsúil dhaonna é. Caitheann sé a chuid ama agus a chuid airgid ag iarraidh an tuairim sin a chur i gcrích. Samhlaigh na rudaí a d’fhéadfadh duine a dhéanamh dá mbeadh sé dofheicthe, a dúirt sé leis féin! I ndeireadh na dála, éiríonn leis ach cén costas a bhí air i ndáiríre? Insíonn an scéal cáiliúil seo le H.G. Wells mar a d’éirigh le fear aisling a réaladh agus an tslí a chuaigh sé i gcion ar na daoine eile a casadh air, go háirithe i sráidbhaile beag tuaithe, Baile Ipa. An fíor nach mar a a shíltear a bhítear i gcónaí.”

Tá an leabhar le ceannach 

ó Shiopa Leabhar CnaG i mBÁC 

ANSEO

____________________________

Freisin le HG Wells:

Cogadh na Reann

The War of the Worlds

____________________________

Aistriú Litríochta

_____________________________

Primo Levi: A Life | An Tábla Peiriadach (Aistrithe ag Matt Hussey)

An Tábla Peiriadach

II sistema periodico 

le Primo Levi

Aistrithe ag Matt Hussey

Coiscéim 2016

ISBN 6660012160235

Lth/Pgs 252

Bog/Softcover

€10.00

Tá An Tábla Peiriadach ina rud an-speisialta. Idirghníomhú eolas as cuimse agus taithí uafásach, móide scileanna liteartha tarchéimnitheacht, atá catalaithe ag ceann eile atá níos deacra a mheas, a d’fhéadfá a thomhais mar – maitheas. Má bhí tú ag lorg leabhar maith, leabhar maith i ngach ciall, is é seo é. An leagan Gaeilge le Matt Hussey.

LITRÍOCHT

——————

Imbolc 2020 - Liam Mac Cóil

 Imbolc 2020 - Liam Mac Cóil from Imbolc on Vimeo.

An Dragan Mór Dearg agus an Cat Mara (Blosc, An 31 Iúil 2020)

An Dragan Mór Dearg agus an Cat Mara 

(Blosc, An 31 Iúil 2020)

An bhfuil an Dragan Síneach ag brúchtadh tine lenár sibhialtacht a scriosadh? De réir tuairisce a bhí ann sa Guardian an lá fá dheireadh, tá imní ar na cúig shúil go bhfuil (29 Iúil 2020). “Cé hiad na cúig shúil?” arsa tusa. ‘Siad na seirbhísí faisnéise sa Bhreatain, SAM, an Ceanada, an Astráil agus an Nua-Shéalainn – nó maistrí an domhain de phór Angla-Shacsanach a bhíodh i dtús cadhnaíochta i dtrádáil, i dtionscadal agus i dtréadaíocht an chine dhaonna le dhá chéad bliain anuas. Bhíodh na meáin Shasanacha ag tabhairt amach gan stad ná staonadh faoi bhagairt na Síne le breis is bliain anuas. Uaireanta, síltear na mbíonn fáic ar nuacht na teilifíse don tAngla-Shacsanach cois teallaigh [seachas na figiúirí Covid is measa ar domhan ar ndóighe) ach scéalta faoi mhuintir chróga an Hong Cong atá i mbearta crua i láthair na huaire lena mbunchearta daonlathacha a tharrtháil ó thíoránacht na gcumannaithe.

TUILLEADH

____________________

'DUBLINERS' le James Joyce - Aistriúchán le Domhnall Nagreine le fáil anois

MUINTIR DUIBHLINNE

- Aistriúchán le Domhnall Nagreine

Tá aistriúchán ar an leabhar Dubliners le James Joyce le fáil anois le Domhnall Nagreine mar aon le réamhrá agus nótaí míniúcháin ar ghnéithe den bhuntéacs agus den aistriúchán. Tréaslaímid a shaothar aistriúcháin leis! Is iontach go deo gur chuir an t-aistritheoir a shaothar ar fáil. Tá an comhad .odt (is féidir a oscailt le MS Word) le fáil anseo:

https://www.aistriulitriochta.ie/muintir-duibhlinne/

________________________________________

FREISIN:

‘James Joyce agus an Ghaeilge’

le JJ O’Reilly (Comhar, Meitheamh 2018)

________________________________________

FÍSEÁN: Catherine Connolly - ‘Is deacair muinín a chur sna hairí mura n-aithníonn siad go bhfuil géarchéim sa Ghaeltacht’ (Tuairisc, Iúil 10 2020)

FÍSEÁN: Catherine Connolly - ‘Is deacair muinín a chur sna hairí mura n-aithníonn siad go bhfuil géarchéim sa Ghaeltacht’

Deir an Teachta Dála neamhspleách Catherine Connolly gur chuir sé ‘olc’ uirthi nár aithin ceachtar den dá aire Gaeltachta nua ina gcuid óráidí sa Dáil inné go raibh géarchéim sa Ghaeltacht

Tá sé curtha i leith airí nua na Gaeltachta gur easnamh mór ab ea é ar a gcéad óráidí sa Dáil nár luaigh siad ar chor ar bith géarchéim teanga na Gaeltachta.

Dúirt an Teachta Dála neamhspleách Catherine Connolly, a bhí ina cathaoirleach ar choiste Gaeilge an Oireachtais le linn thréimhse an rialtais dheireanaigh, gur chuir sé “olc” uirthi nár aithin ceachtar den dá aire nua, Catherine Martin agus Dara Calleary, ina gcuid óráidí sa Dáil inné go raibh géarchéim sa Ghaeltacht.

Chuir Connolly fáilte roimh cuid dá raibh le rá ag Aire Stáit na Gaeltachta, Dara Calleary, agus ag an Aire sinsearach, Catherine Martin, ach dúirt sí go mbeadh sé deacair muinín a chur iontu mura n-aithneoidís go bhfuil géarchéim ann.

“An rud atá in easnamh ná comhthéacs agus cúlra. Níl aon chomhthéacs anseo, a airí, maidir le, mar shampla, an ghéarchéim atá sna Gaeltachtaí uilig ar fud na tíre. Níl aon aitheantas tugtha don ghéarchéim atá ann ó thaobh na teanga, agus cuireann sé sin olc orm i ndáiríre. Agus níor mhaith liom tús a chur le m’obair libhse i mbealach diúltach ach tá gá le haitheantas a thabhairt nuair atá sibh ag caint faoi chúrsaí airgid agus caiteachais.

“Mar a dúirt mé, is rud dearfach na figiúirí [na meastacháin Roinne] ach gan cúlra agus gan aitheantas don ghéarchéim atá ann, tá sé thar a bheith deacair muinín a bheith agam as an gcaiteachas seo,” arsa Catherine Connolly.

Mhol an Teachta Dála neamhspleách don Aire Meán, Turasóireachta, Cultúir, Ealaíon, Spóirt agus Gaeltachta, Catherine Martin, go léireodh sí “ceannaireacht ón tús” agus go mbeadh a cuid óráidí i nGaeilge feasta.

Dúirt Catherine Martin go labhródh sí Gaeilge oiread agus ab fhéidir sa Dáil.

Tá roinnt ráiteas láidir déanta sa Dáil ag leascheannaire an Chomhaontais Ghlais faoin nGaeilge agus faoin nGaeltacht ó toghadh ina Teachta Dála ar dtús í in 2016.

Tá sí ar dhuine den bheagán Teachtaí Dála a bhfuil glactha acu leis go bhfuil géarchéim teanga sa Ghaeltacht.

Dúirt sí níos luaithe an tseachtain seo nach bhféadfadh “aon duine a shéanadh” go bhfuil géarchéim teanga sna ceantair “is laige” ó thaobh na teanga.

TUAIRISC

_____________________________